جمائت و باورمندانی شریکداری
جمائتئے ارزشت
لبزِ ”جمائت، یا کانگریگئیشن“ اسلا انچێن رُمبێا گوَشنت که آییئے باسک په مزهبی ابادتێا هۆرَ بنت. سرجمێن انجیل شریفئے تها، باورمندانی جمائتئے سکّێن پُرارزشتێن کردے مان روهی رُدۆم، وبادت و کمیونٹیا هست.
انجیل شریفئے بازێن جاگهێا جمائت یا مُچّیئے ارزشتئے بئیان
. پجّار: مانا و لێکه
ابرانی 10: 24- 25 ”بیاێت هما راه و درانَ چارێن که چۆن یکدومیا په مِهر کنگ و شَرّێن کاران دلبَڈّی بدئیێن، وتی باورمندی نِند و نیادان یله مکنێن چۆ که لهتێنا اِشانی یله دئیگ هێل کرتگ. اے نیادانی یله دئیگئے بدلا بیاێت یکدومیا دِلبڈّیَ دئیێن، هاس که شما گندێت که هُداوندئے آیگئے رۆچ نَزّیکّ اِنت.“ اے آیت باورمندانی هۆر و یکجاه بئیگئے ارزشتا برجاهَ کنت.
اے یکدومیئے دلبڈّی و دلڈڈّی دئیگئے سرا زۆر دنت که آ گۆن یکدومیا مهر بکننت و شرّێن کار بکننت.
. بُنکّی کلیسائے مسال
کاسدانی کار 2: 42- 47 بنداتی باورمند ”آیان وتا په کاسِدانی تالیما، په شریکدارێن زِندا، په نَگنئے چُنڈ چُنڈ کنگگ و په دْوایا وَپْک کرت… آیان وتی مال و مِلکت بَها کرتنت و زرِّش هر یَکّێئے زلورتانی هسابا سجّهێنانی سرا بهرَ کرتنت… هر رۆچ په همدلی مُچَّ بوتنت.“
بنداتی کلیسا پرجۆش و گۆن یکدومیا بندۆکێن کمیونٹیێئے مهکمێن مسالے اێرَ کنت که آیان هۆریگا درَ بُرت، ابادت کرت، و وتی زند گۆن یکدومیا بهر و بانگ کرت.
مسیهئے بدن
کُرنتیان 12: 12- 27 پولُس ایسّا مسیهئے بدنا چێدگے کنت و کلیسایا بئیانَ کنت. هر آزاے المّی انت، و درس په بدنێئے شر کار کنَگا پکار انت. جمائت چۆ بدنێا انت که اۆدا هر آزاے هاسێن کردے پیلۆ کنت و هچّ کرد بےارزشت نه انت. تپاکی و یکدومیئے سرا بێسه کنَگ هژدری انت.
یکدومیئے دلبڈّی دئیگ و ردیان راست کنَگ
کلۆسیان 3: 16 ”شمئے دل و درون چه مَسیهئے تالیما سررێچ ببیت. یکدومیا گۆن کاملێن هِکمتے تالیم و دلبَڈّی بدئیێت. زبوری سئوت بجنێت، هَمد و سنا بکنێت، روهی نازێنک بجنێت و وتی دلا هُدائے شُگرا بگرێت.“
جمائت یک پلێٹفارمے که اۆدا باورمند سر و سۆج دات کننت، راست کرتَ کننت و یکدومیا دلبڈّی داتَ کننت، گۆن آیانی هئوارێن اێمّانا پُربرکت کنَگا.
. رُدۆم و سرپدی
اپێسُسیان 4: 11- 16: ادا پولُس کاسد، پئیگمبر، مستاگئے نبشته کنۆک، پادری و استادانی کردا بئیان کنت که آ چۆن نێکێن مردمان په منسٹریئے کاران و ایسّا مسیهئے بدن یا رمبئے اڈ کنَگا ائوزار بدئینت یا سلهبند بکننت.
جمائت جاهے دنت که اۆدا روهی ٹێکی په وت مان وتا یکدومیارا تچک و راست کنَگا کارمرز بنت و ایمّانئے تها پُهتهی و سرپدیئے نێمگا رهشۆنَ بنت.
. جئوابدهی و نۆک کنَگ
گلاتیان 6: 1- 2 ”برات و گُهاران! اگن کَسے گناهێا کپتگ، شما که پاکێن روهئے هسابا زندَ گوازێنێت، آییا په نَرمی پدا راستێن راها بیارێت. بله هرکس وتی هئیالا بدار یت که چَکّاسێا مکپیت. یکدومیئے باران بَڈّا کنێت. اے ڈئولا شما مَسیهئے کانونئے پرمانبرداریا سرجمیا کنێت.“
جمائتێئے تها بئیگ جئوابدهیئے ترزے پێشَ کنت که اۆدا باورمند یکدومیارا تچکێن راهئے سرا جلّگا کُمکَّ کننت.
. ابادت
زبور 22:22 ”وتی براتانی کِرّا تئیی نامئے جارا جنان، جمائتئے دێما ترا نازێنان.“
جمائتئے تها هۆر و یکجاه بئیگ ابادتئے تها همتئواریے کاریت، که آ تئوسیپ و ستائے تجرُبتا گێشَ کنت.
اکّلیسیا: گوانک جتگێن مُچّی
متّا 16:18 ”ترا گوَشان که تئو پِتْرُس ائے و اے مُهرێن کۆهئے سرا من وتی کِلیسائے بُنیادا اێرَ کنان (اکّلیسیا) که مَرکئے زۆر آییئے سرا بالادستَ نبیت.“
ایسّا مسیه وتی اکّلیسیائے اڈ کنَگئے بارئوا هبر کنت، که آ باورمندانی کمیونٹیا روهی جمائتے لێکیت که چه دنیایا گوانک جنَگ بوتگ انت. کاسدانی کار 7:38 ئے تها استپان که اسراییلیانی بارئوا گوَشگا انت، ”جمائت (اکّلیسیا) مان گئیابانا“، اے نامشَ دنت.
اے آیت مارا ترانگا گێجیت که ”گوانک جتگێن مُچّی“ اے لێکهئے هُنڈال بائبلئے تها هم مان اَنت، که اۆدا اسراییل چه مسرا گوانک جنَگ بوتگ.
جێڑگ
جمائتئے بهر بئیگ تهنا هپتگی دیوانان هئوار بئیگ نه انت. اے گۆن روهی هاندانێا همگرنچ بئیگ انت که آ هۆریگا درَ بارت، ابادت و هزمتَ کنت و هۆریگا رُست و رُدۆمَ گیپت.
جمائتانی تها باورمندانان تاکت، مکسد، دلبڈّی و جئوابدهی رسیت. هر باورمندے چه بهر بوتگێن تجربتان، دانایی و چه وتی همراهدارێن کلیسایانی باسکان رستگێن ٹێکیان پائدگ چستَ کنت. انفرادیتئے اے دئورا انجیلی جمائتئے رنگا مارا کمیونٹی و گۆن یکدومیا ایمّانئے سپرئے ترانگا گێجیت.
وتی الاکهی جمائت یا شریکداریئے تها وتی هئواری و بهرئے بارئوا بجێڑێت. شما تهنا هئوار اێت، یا شرّێن وڑێا بهر زورگا اێت؟
انچێن راهانی بارئوا پگر کنێت که شمئے گۆن شمئے همراهێن باورمندانی همگرنچیا مُهکمتر کرت بکننت. شما بلکێن کسانێن رُمبێئے بهر ببێت، وت مان وتا وتی مُچّیانی کار و چیزّان بهر بزورێت، یا منسٹریێا هزمت بکنێت.
چه وتی کمیونٹیا کسێئے که شما دێر اِنت هال و اهوال نکرتگ، هالا بگرێت. آیان دلبڈّی بدئیێت، گۆن آیان دوا کنێت، یا اێوکا زندئے تجرُبتانی بارئوا هبر بکنێت.
اے گپّا بزانێت که شمئے ٹێکی، تُرے کسانێن ٹێکی هم، په ایسّا مسیهئے رُمبا چینچُک پُرارزشت انت. اشیئے بارئوا رهشۆنی بگرێت که اشان شما چۆن جمائتئے تها اسرمندێن ڈئولێا کارمرز کرتَ کنێت.
انچۆ که شما شریکدایئے تها هئوارَ بێت، مدام وتا اشیئے مسترێن مکسدانی ترانگا بگێجێت: آ انت هدائے شان و شئوکت دئیگ، یکدومیا راست کنَگ، و دنیائے دێما شاهد بئیگ. بلێت که اے مکسد مان کمیونٹیا شمئے کار و رابتهانی رهشۆنَ بنت.