ایش نبشتانکک تھا ما اش ھبرا گیشینن کہ
۔اسلام چیا وتی باورمندانا آیانی ماتی زبانا نماز وانگ ئے اجازہ ندنت
۔مسیھی باورمندانی واستا وتی ماتی زبانا چیا اِبادَت کنگی زلوری اِنت۔
ماتی زبان
ایش ھبر دلگئوش کرزیت کہ یک مسلمان ئے ھما زبانا نماز ونت نکنت کہ آ زبانا شَرّیا سرپد او پوہ بیت کہ آ چے گئوشگا اِنت او چی وانگا اِنت۔ بلے آییئے واستا عربی زبانا وانگ زلوری اِنت بلے کہ وت سرپد نبیت کہ من چہ گئوشگا اوں و چہ وانگا اوں۔ بلوچانی او ایندگہ کئومانی تھا سک باز مردم است کہ چہ ۵۰ سالاں یکوئی نماز وانگا اَنت بلے انگتا ھم آیانی عربی شَر نہ اِنت۔ یک نام و دپیں مفتی ئے ذگری بلوچاں مسکرائی کنت و گئوشیت کہ آ شَرّیا کلمہ شہادت ئے وانگا نزاننت۔ ھمئے مفتی مَسیت ئے تھا نندوکیں نمازیانی دیما وتی مدرسائے شاگرداں پَرمائینیت کہ شما کلمہ ئے شہادتا بُوانِت۔ مدرسہا ئے نوکدربر کوکار کننت و کلمہ شہادتا سعودی عرب ئے گالوارئے تھا واننت۔ او ذگری بلوچانی کلمہ وانگ ئے گالوار و لہجہ ئے سرا کَندَنت و مسکرائی کننت۔ بلے ھمئے نام و دپیں مفتی ھچ کِمار نکنت کہ ھمئے مَسِیتی تھا دگہ سداں انچیں بلوچ ھم نندوکیں کہ آ ھم کلمہ شہادتا سرجمیا سعودی عرب ئے گالوارا ونت نکننت۔ بازیں بلوچ جنیادم ھم کلمہ و الحمدو ( سورہ فاتحہ) و قل وللہ ( سورہ اخلاصا) شَریں گالواریا گوں ونت نکننت۔ مروچیگیں مُلا و مفتی سعودی عرب ئے عربی گالوارا عقیدہ و اسلام نامے سرا اللہ تعالیٰ زبان گئوشگ و بلوچی زبان ئے بے شرپی او توہین جاربادشاہی کنگااَنت۔ باید اِنت ذگری بلوچانا ساڑھائگ ببوتیں کہ بلوچیا بزان وتی ماتی زبانا چوگان کننت۔ اسلاما اَبید ایندگہ درستانی دِینانی منوک وتی وتی ماتی زُبانا ھدائے اِبادَت کننت۔ ایوکا اسلام اِنت کہ مذہب و عقیدہ ئے نام ئے سرا عربی زبان، عربی پوشاک و عربانی دودربیدگا کئومانی سرا مُشَگا اِنت۔ اسلام وتی منوکان لاچار کنت کہ آ کوہنیں عربانی ورگ ورگئے رسمانا سُنت مھمدیؐ ناما بدیئنت و لَس مھلوکا سِکین دیئنت کہ ھمایانی پئیما ورگ ئے ورگا رند وتی لَنککاں بِچٹّنت و بِچُوسَنت۔ اسلام مذہب و عقیدہ نام ئے سرا عربی زبان و عرب کلچر ئے دیما بَرگ ئے دومی نام اِنت۔ بلوچ زبان ئے دیمرئی واستا مروچیگیں مُلا و مفتیانی کِرد چہ اِنت؟ ۔ جمعہ ئے نمازاں اِیشانی دراج کَشیں وازانی تھا ایوکا “اَنت وکَنت” بلوچی اَنت ایندگہ سجھیں ھبر مزن مزنیں عربی زبانا اَنت ۔ مئے ملا و مفتی گئوشنت ” محمدؐ ارشاد فرمائینت” اِشانی نزّا، بلوچی ئے “مھمدؐ گئوشت” ھمئے “گئوشت” نزور اِنت ایشی تھا شرپ مان نیست۔ مروچی مَدرسھاں وانوکیں چُکانی بلوچی پہکا عربی ئے چَھرگ و درْوشما جنت۔ نمازئے وانگ عربی زبانا چیا المی اِنت؟ بلوچ چیا وتی ماتی زبانا نماز ونت نکننت؟ اگن ایش وڈیں جست بکن ئے مردم مارا گنوک گئوشنت۔ ایشی سئوب کہ چہ صداں سالاں عربی زبان ئے اِشکنگا اَنت۔ یک ھبرئے اگن چہ سک دیراں یکوئی و دایما چَکّرِینگ و تَرینگ و گئوشگ ببیت، انسانی ذہن و دماگ آئیا آدت کنت و قبول کنت۔ ھمئے ” آدت” اِنت۔کہ عربی مردمانی دِلاں نشتگ۔ بزان ذہن ھا را انچو عربی ئے “آدت” بوتگ او عربی یکوئی انچو رِیپیٹ بوتگ کہ مروچی بلوچ اوں ھمئے مارَنت کہ بلوچی زبان نماز وانگ ئے لائک (فِٹ) نہ اِنت۔ چیا؟ چیاکہ مُلا و مفتی ایش ھم گئوشنت کہ قبر ئے تھا پِرشتگ ھم عربی زبانا ھبر کنت۔ اگن ایش عربی زبان ئے کئومانی سرا مُشَّگ نہ اِنت کہ گڈا چہ اِنت۔ مردمانا چہ وتی ماتی زبانا دُور کنگ نہ اِنت گڈا چہ اِنت
مسیھی باورمندانی واستا وتی ماتی زبانا چیا اِبادَت کنگی زلوری اِنت
بلے عیسیٰ مسیھ ئے تالیم و سئوجانی رِدا بلوچی زبان و ایندگہ کئومانی ماتی زبان ھدا ئے واستا پاکیں زبان اَنت۔ تورات موسیٰ ئے ماتی زبان عبرانیا اَت۔ سدھارت گوتم بدھا ھا پالکی زبانا تالیم دات۔ اگن ھدایا موسیٰ ئے گونا عبرانی بدلا پالکی زبان یا سنسکرت زبانا ھبر بکتیں؟ گڈا موسیٰ وتی ٹیلگاں سرپدبوت؟ نَبیّانی گونا ھمایانی ماتی زبانا ھبر کنگ ئے مسترین مول و مراد ہمیش اِنت کہ ھدا “ماتی زبانا شرپ دنت” مثلاََ ” ھدایا عبرانی زبانا موسٰی ھا توار کرت ” ” تورات عبرانی زبانا اِت” ایش ھبرانی معنا ایش نہ اِنت کہ ھدائے زبان عبرانی اِنت۔ یا ھدا عبرانی زبانا چہ ایندگہ زباناں گیشتر دوست داریت۔ نہ۔ بلکل نہ۔ ایشی اسلی معنا ایش اِنت کہ ھدا شَرّیا زانت کہ موسیٰ ئے ماتی زبان عبرانی اِنت۔ موسیٰ عبرانی زبانا سرپد بیت۔ گڈا عبرانی تھا ھدائے پیگام ئے معنا ایش اِنت کہ ھدا ماتی زباناں شرپ و اِزت دنت ” ھدا گوں ھر کسا کہ ھبر کنگ لوٹ ایت۔گوں آییا ھماییئے ماتی زبانا ھبر کنت۔ انجیل مقدس ، کاسدانی کار در ۲، آیات ۱تا ۱۱ )
(acts of apostles chapter 2 verse 1-11)
ایش یازدئیں آیتانی تھا پانزدہ ٹک و کئومانی مردماں چہ عیسیٰ مسیھ ئے شاگردانی دپاں و چہ پتروسئے وازا وتی جندئے ماتی زبانا ھبر اِشکتنت۔ ایش ماتی زبان ھدایا وت جَرِیدگ کرتگ اَنت۔بزاں عیسیٰ مسیھئے شاگرد یک جاہے مُچ اَتنت۔ چہ آزمانا آیانی سرا شھم دیوکیں آس ئے زبانک نازل بوت۔اوروشلمئے شہرا پانزدہ کئوم و ٹکانی زبانانی تھا ھبر کنوک مردم مُچ اَتنت۔ ایش سجھیں کئومانی مردماں ارامی و عبرانی یونانی زبان ھم زانتگ کہ کاروبار ئے ھاترا اوروشلما اتکگ اَنت۔ بلے انگت ھدایا ماتی زباناں شرپ و ارزشت دیئگ ئے ھاترا چہ یکیں پتروسئے دپا ھمیش سجھیں کئومانی مردمانی ماتی زبانا ھبر کَش اِت۔ ھمک کئوم و زبان ئے مردما وتی جندئے ماتی زبان چہ پتروسئے زبانا اِشکت۔ مروچی مسیھی باورمند وتی وتی ماتی زباناں ھدائے اِبادَتا کننت۔ ھدائے توسیپ و سنایا کننت۔ مسیھی باورمندانی واستا زلوری نہ اِنت کہ ھما زبانا کہ عیسیٰ مسیھا ھبر کتگ بزاں ارامی و عبرانیا ھبر بکننت۔
یا انجیل مقدس بندری زبان یونانی اِنت آ یونانیا را ھدا ئے زبان نہ گئوشنت۔ مسیھ ئے باورمندانی واستا المی نہ اِنت کہ ھما وڈیں پوشاک کہ عیسیٰ مسیھا پوشیتگ، آییئے باورمند ھم بپوشنت۔ ایش ھم لازم نہ اِنت کہ ھما وڈا عیسیٰ مسیھا ورگ وارتگ آییئے باورمند ھم بورنت۔
چیاکہ مسیھ ئے مول ومراد مہر و دوستی ئے سکین دیئگ اِنت۔ یک ھاسیں زبان و دودربیدگ ئے دیما بَرَگ نہ اِنت۔
بلوچ مسیھی باورمند ایش ھبرا ستک و جزم اَنت کہ ھدا ایندگہ ماتی زبانانی پئیما بلوچی زبانا ھم دوست داریت۔ بلوچی زبان ئے تھا اِبادتا قبول کنت۔ ھدا بلوچیا سرپد بیت۔ چیاکہ ھدایا سجھیں نَبیّیانی گونا ھمایانی ماتی زبانا ھبر کرت و ھمایانی ماتی زبانا وتی پیگام ئے دات۔ ایشی متلب ایش اِنت کہ ھر مردم ئے ماتی زبان ھدائے ھاسین زبان اِنت۔ بلوچی منی ماتی زبان اِنت و بلوچی ھدائے ھاسین زبان اِنت۔ منی ھدا بلوچی زبانا ھبر کنت۔ من بلوچیا گوں ھدایا۔
بلوچی بگئوش ، بلوچی بوان، بلوچی نبشتہ بکن، بلوچیا اِبادَت بکن۔