اسل و بندری انجیل
بازێن مسلمانے گوَشیت که چار انجیل شریفئے بئیَگ وت اے گپّئے شاهد اِنت که بائبل بدل کنگ بوتگ، انجیل یکّے بوتێن (ایسّا مسیهئے انجیل). مسلمانانی اے رَد پهمیئے بُنیاد کُرانیئے الهام و بائبلئے الهامئے پرَکئے سئوَبا اِنت. اے مردم مسیهیتئے تها الهام آ پئیما نه اِنت که کُرانئے تها اِنت. مُسلمان گوَشنت که جبراییلا مُهَمّد الهام داتگ و کُران آورتگ. اِشانی هئیالا انجیل هم همے پئیما جبراییلا آورتگ و ایسّایا سر کرتگ، و پدا ایسّایا اے کتاب نبشته کرتگ و په وتی رندگیرا اێر کُرتگ، همے پئیما که مُهَمّدا په وتی رنگیران کُران اێر کرتگ. پمێشکا بازێن مُسلمانے گوَشیت که مَتّا، مَرکاس، یوهَنّا و لوکائے انجیل اے گپّئے نشانی اَنت که مسیهئے انجیل گار بوتگ و مسیهئے مَرکا رند آییئے شاگردان اے انجیل نبشته کرتگ اَنت. گڑا، اے هئیال رئوا اِنت؟
گارێن کتاب کُج اِنت؟
هِچ تاریخی نبشته اے هبرا نکنت که ایسّایا انجیل نامێن کتابے بوتگ. هرکَس که اے هبرا کنت، باید اِنت وتی اے گپّئے هَکّا سبوت پێش بکنت که اے کتاب بوتگ. گڑا، نوں؟ اے گپّئے جئوازے هست که آ انجیل که هُدایا وتی پئیگمبرئے سرا راه داتگ، آ گار بوتگ و اے نَکلی پَشت کپتگ اَنت؟ اگن انچُش اِنت گڑا اے گپّئے مانا اِش اِنت که مسیه وتی مِشنا ناکام بوتگ و آییئے دژمن کامیاب بوتگ اَنت؟ گڑا هُدا وتی مسیهئے گِچێن کنگا رَد کپتگ؟ اے نون گپّے که هُدا پئیگمبرێا انجیلے دنت و دێم دنت که منی مردمانی رهبریا بکن، و اے انجیل پَهکا گارَ بیت، یَکّ دانَگے هم پَشتَ نکپیت، و نکلی و بدل کتگێن انجیلئے هزاران کتابَ بنت و گارَ نبنت؟ اے باوَری گپّے که مسیهئے یک هم شاگردێا آ اَسلی انجیلئے نه نام گِپتگ، نه جاگهے آییئے هبرے نبشته کرتگ، نه هبرے کرتگ؟ اے باوَری گپّے که مردم بگوَشیت که جهانئے دراهێن تاریخدان همشئور بوتگ اَنت که بیا اَسلی انجیلئے هبرا هم گارَ کنێن؟ اے چۆن بوتَ کنت که جهانئے تها یک هم مردمێا چُشێن هبرے نکُرتگ که ایسّا مسیهئے سرا انجیلے نازل بوتگ؟ هِچ مسلمان چه اے جُستان یکّێئے هم شِهمێن جوابے دَر گێتکَ نکنت.
هُدا وتی گالا چێا پدّر و زاهِرَ کنت؟ په مردمانی رهشۆنی و رهبریا، یا نه؟ گڑا چێا هُدا یکبرے وتی گالا دێمَ دنت که مردم راها بگِندنت، بلے رندا کِلّیت که مردم اِشیا تاب بدئیَنت و بدل بکننت؟ آ کجام هُدا اِنت که جهانئے دراهێن زۆرانی واهُند ببیت و انگت وتی جندئے گالئے بدل بئیَگا داشت مکنت؟ هَتّا بادشاه و هاکِمان هبرے که کرتگ، کَسِش نئیستگ که آ هبرا بدل بکننت. هاکم هم وتی دراهێن زۆرا جننت که کَس آهانی اهتیارئے تها دئور کُرت مکنت. گڑا اے چۆن بوتَ کنت که کامِلێن هُدا، دراهێن زۆر و واکانی واهُندا وتی جندئے انجیل تا ابد رَکّێنت نکُرت؟
آیا انسانی انجیل چه هُدایی انجیلێا تاکَتوَرتِر اِنت؟
هر چارێن انجیل ائولی سَدی میلادیا نبشته کنگ بوتگ اَنت. ائولی دئورئے مسیهیان اے کتاب وتی آیۆکێن نَسلانا دئیان کُرتگ اَنت و دراهێن تاریخئے تها اے انجیلانی هبر نبشته کنگ و کار بندگ بوتگ اَت. مسیهیانی وازانی تها، سئوتانی تها ، کِسّهانی تها همے انجیلانی هبر مان اَنت. دو هزار سالئے تها یک جاگهے، یک مردمێا، یک دانَگے چُشێن هبرے، گالے هم دَر نگێتکگ که بکئولِ مسلمانانیا، چه اَسلی انجیلا ببیت.
مسیهئے سَلیب کَشّگ و جاه جنَگ، و ائولی انجیلئے (مَرکاسئے انجیلئے) نبشته کنگئے نیاما چِلّ سالئے وهد اِنت. گێشتر زانتکارئے هئیال اِش اِنت که اے انجیل چه هپتاد میلادیا پێس نبشته بوتگ. مسلمان چێا جێڑنت که آ اَسلی انجیل، که هُدایا مسیهئے سرا نازل کرتگ، آییا چِلّ سال هم اُمر نکُرتگ؟ اے اَجبێن گپّے که هُدائے آسمانی پئیگام، گار بوت و انسانئے سرا هِچ پئیمێن اسَرے، نشانے هم پَشتی نگێتک، و دومی نێمگا انسانان دگه انجیل نبشته کرت و اے انجیل گار هم نبوتنت و انسانی تاریخئے سرا اینکسێن مزنێن اسرے هم کُرتِش، تان هزاران سالا.